Têgêrayîşê Cinîyan ê Azadan (TJA) ke bajaranê Kurdîstan de derheqê şîdetê vera cinîyan de cigêrayîş kerd, banê DBPyî yê Amedî de raporê xo eşkera kerd. Endamê Meclîsê Dayîkanê Haştîye, Komela Cinîyan a Roza zî tewrê kombîyayîşî bîyî. Kombîyayîş d fotografê Denîze Poyraz, Îpeke Er û Gulîstanê Doku ameyî daliqnayene.

Raporo ke binpaykerdişê mabênê çele-êlula 2021î tede ca genê hetê aktîvîsta TJA Dîlane Guvenç ra ame parekerdene. Guvençe ard vist vîrî ke qetilkerdişê cinîyan o ke çapemenî de ca geno o têna nîyo û vat:  ''Rewşe naye ra wetêr a. Bajaranê ma de cinîyî hetê unîformayînan ra yenê hedefgirewtene. Pratîk de şero taybet esto. Têna qirkerdişo fîzîkî ne qirkerdişo zafhetin esto. Cinîyî rîyê nasname, kultur û vîjnayîşê xo yê polîtîkî ra zî yenê cezakerdene. Îqtîdarê AKP-MHPyî îradeyê cinîyan hedef geno. Qeyûmî, krîmînalîzekerdişê hemserekîye û peyserantişê Pêkerdişê Îstanbulî nê polîtîkayan têna çend hebî yê.

Kurdîstan de vera cinîyan polîtîkaya cîya yena caardene. Pê planê çokdayîşî  tecrîdê Îmraliyî sere de zîndanî damarê xoverdayîşê komelî yeno hedefgirewtene.  Vera kurdan û cinîya kurde heme sûcê dewlete binê nameyê 'teror' de yenê meşrukerdene. Polîtîkayê zaf leyminî yenê rayraberdene. Kesê unîformayinî bitaybetî bi rayîrê medya cinîyan xapînenê. Tewr zaf zî cinîyê ciwanî binê nameyê heskerdiş, eşq û zewajî de yenê xapînayene. Bedenê cinîyan zit yenê teşhîrkerdene, cinîyî nezaret de raştê tecawuz û tacîzî yenê, cinîyî barkerdişî rê mecbur manênê û banê partîye de yenê qetilkerdene. Ma sey cinîyan ê kurdan senî ke vizêr verê zextan de çok nêda, ewro zî ma do têkoşîn bikerê.''

Goreyê raporî ke ame parekerdene 9 menganê verênan ê serre de netîceya şîdetê camêrdan de 64 cinîyan dinyaya xo bedilnaye. Qetilkarê 17 cinîya bewlî yê 47 kesan zî sey bi hewayê şikdarî ameyî qeydkerdene.  321 cinîyî raştê şîdetê camêrdan ameyî. 9 cinîyî raştê tecawuzî û 9 cinîyî raştê tacîzî ameyî. 75 cinîyê ke 2020 de nezarat de raştê tacîz û tecawuzî ameyî înan ra 45 cinîyî kurd ê. Faîlî zî wina yê: 49 polîs,15 leşker, 3 tîmê taybetî, 1 qoricî, 19 memurê pawitişê Înfazî, 1pawitox, 30 memurê dewlete yê bînî,1 DAÎŞ.