Kurdkî dezgehanê muhakemekerdişî de çin hesibîyena. Serra 2012î de grevê vêşanîye yê tepişteyan ra dima hem tecrîdê vera Rayberê Şarê Kurdî Abdullah Ocalanî amebi wedarnayene hem zî heqê pawitişê bi ziwanê dayîke dîyabi tepişteyan. 24ê çeleyê 2013î de no heq pê qanûnê 6411. ame qebulkerdene. La waştişê heqê açarnayoxan, açarnayoxîya katîp û mubaşîran hema zî mesele yê. 

Baroyê Amedî semedo ke verê nê meseleyan bigêro û tepişteyî bieşkê bi kurdkî pawitişê xo bikerê binê sîwana Komeleya Cigêrayîşan a Ziwan û Kulturê Mezopotamya (MED-DER) de semedê avûkatan kursê kirdkî û kirdaskî akerdî.

Hemserekê MED-DERî Rifat Ronîyî pare kerd ke avûkatî eleqeyêkê pîlî mojnenê kursan û vat: ''Avûkatî semedo ke muwekîlanê xo weşêr fam bikerê û waştişanê înan bidê famkerdene tewrê kursanê ma benê. Ê do bi xo açarnayoxîya muwekîlanê xo bikerê. Nika 10 sinifê ma estê. La înternetî ser o 10ê ci kirdkî 50 sinifê ma aktîf ê. 

 Ziwan bingeyê neteweyêk o. Domanî zî kokimî zî wa şorê kursan, ziwanê xo bimusê aver berê. Semedo ke ziwanê ma bibo wayîrê statuyêkî ganî ma zêdêr xîret bikerê.''