Artêşa tirke heta 3ê êlule hêrişanê xo yê rûtînan rê dewam kerd. Metodo teberê merdimîye yo ke nêşuxulnayo nêmend. Prosesê şerî de, boya  ke nêameyî antene, duyo ke nêame vînayene , teqayîşo ke nêame eşnawitene nêmend. 2014î ra nata tunelê biheybetî yê Zagrosan ê ke bi arêqê bi seyan gerîlayan û ge-ge rişnayîşê gonîya înan ameyî înşakerdene verê dişmenî de sey kela vindetêne û gerîlayî pawtêne. Dewleta tirke di mengan ra zafêr vera 9 gerîlayan bêçare mend. Se beno wa bibo gerîlayî do serbikewtêne. Şehadetê Bazî de no amebi îlankerdene. 

Mizgîne Dalaho, Armanc Sîmko û Têkoşîne Devrîm ê ke xoverdayîşê Girê Sorî yê 80 rojan de ca girewt qala nê xoverdayîşî kerde. Beşo pancin û peyên wina yo:

Hêrişo ke nêmaneno hêrişanê bînan

A roje ameyêne texmînkerdene ke artêşa tirke çîyêk bikero; ameyêne vatene ke beno ke çekê kîmyewî bêrê şuxulnayene û ya zî teqayîş bibi. Heme na babete de ameyî hîşyarkerdene.  Şeşê înan qatê cor û hîrê yê înan zî qatê cêr de bî. Saete 18:00 de teqayîşêk bi. Rixmo ke teqayîş zaf bitesîr bi vengê ci nêame eşnawitene. Sey erdlerzî ame famkerdene. Dima ra du vejîya ke boya ci zaf xirab bî û no du heta qetê cêrî ame. Hêrişêko cîya bi sey ê bînan nêbi.

Corî ra veng nêvejîya

Armanc û Têkoşîne rîyê xo qefilna û şîyî ke berê pêroyî kontrol bikerê. Armanc heme 5-6 meteryî nêşibi ke gina erdî ro.  Têkoşîne zî dima ra bîye toş û xora şîye. Têkoşînî bîye mor senî ke bifatisîyo, nêeşkeayêne nefes bîgêro. Mizgîne kerd ke aye hîşyar bikero. Waşt vera axûbîyayîşî şitî bido şimitene la aye ziwanê xo gaz kerdbi û nêşimitêne. Bado ke biney ameye xo Mîzgîne aya berd manga. Înan vatêne qey Armanc şehîd bîyo. saete 21:00 de Mizgîne şîye o kontrol kerd hema weş bi la hafîzaya xo vînî kerdbî. Mizgîne o zî berd menga. Înan bi cîhazî veng kerd embazanê xo yê corînan la corî ra veng nêvejîya. Ê dima ra şîyî cor dî ke hêrişo zaf pîl ameyo kerdene.

Serhildan û Botan têkişt de bî

Biney wetê tunelî de cenzayî eysayêne. Serhildan û Botan korîdor de têkişt de şehîd bibî. Dima ra cenazaya Zinarîne ameye dîyene. Manga de zî cenazayê Argêş, Delale û Ozgure ameyî dîyene. Eşkera esayêne ke heme bi tesîrê gazî demê kilmî de fatisyayî û şehîd bîyî. Cenazayî bibî mor û dest wasilê înan bîbî çewt. No dej û hêrs pê vateyî nêno ziwan.

Ê hinî nêeşkayêne uca vinderî

Rewşa Têkoşîne û Armancî hole nêbî. Mizgîne vat ê hinî nêeşkenê tîya vinderê la hetê bînî ra înan nêweştêne ke embazanê xo yê şehîdan caverdê. Nêzanayêne se bikerê. Tewr peynî de înan qeraro zor girewt, do tuneleran ra biameyêne vejîyayene. Mizgîne û Armanc reyna şîyî cor. Xora erzaqê înan çînêbi, nan zî çînêbi. Biney şeker, tahîn û belgeyê rêxistinkî, malzemeyê sey termalî ameyî amadekerdene.  Mizgîne vernî de vejîyaye. Înan bombayê xo girewtî eke biameyêne înan ser înan do bombayî xo ser biteqnayêne. Hîşê Armanc û Têkoşîne ca de nêbi.  Gama ke ê vejîyayî teber binê liganê înan ra kuçe perayî  û veng vejîya. Hêzanê dewlete cade hêriş kerd. Ê kaşî ra leyr bîyî çekê înan zî tira kewtî. Guleyî îsabetê ermeyê Armancî kerd. Înan ser o dronî gêrayêne û dewleta tirke semedê teslîmbîyayîşî vengdayene. Rixmê heme zehmetîye ê badê hewteyêkî Stûnê de resayî embazanê xo.

Sey fermandarêka YJA Starî şehîde bîye

Têkoşînê Girê Sorî de panc gerîlayanê cinîyan ca girewt. Cinîyî tîya zî rengo esasî yê cuya û şerî bî. Mamreşo, Aris Faris û heme cayanê bînan de wina bi. Girê Sor de Zînarîne, Ozgure, Delale rolê xo serkewte ard ca. înan çi şertan de têkoşîn kerd ganî bêro zanayene.  Zînarîne fermandarê takimî bî. Seba ke a wexto derg cayê kadroyanê verênan de mendbî wayîrê tecrubeyê pîlî bî la tim mutevazî bî. Çika zaf bizano zî tim xîret kerdêne bimuso. Vera vengdayîşê teslîmbîyayîşî vindetişê ci zaf zelal bi. Aye tim pê guleyan cewabê teslîmbîyayîşî dayêne.

Pawitişê rêxistine zanayêne

Ozgure 2015 de tewr bibî, hêrişê Heftanînî de zî mendbî. Bado ke perwerdeyê sabotajî dî ameye Avaşîn. Hêrişê Qilê Suleymanî de zî ca girewt. Ozgure xoverdayoxanê verênan ê Girê Sorî ra yewe bî. Erazî û tunelanê şerî de wayîrê tecrubeyî bî. Berpirsîyara fermîye nêbî la aye zanayêne ke partî tira çi pawena. Şerê Heftanînî de rolo pîl kay kerd. Bêters şîyêne dişmenî ser. Aye şehîdan ser o nuştene. Teqayîşê peyênî de birîndar bîyî qismêke rîyê ci vêşa la ey tim xo newe ra afernayêne.

Delale qişkeka Girê Sorî bî

Delale mîyanê înan de hem tewr peynî de tewrê ci bibî hem zî tewr qişkeka înan bî.  Qamişloyî ra bî û 2019î de tewr bibî. Şerwananê neweyan ra dima ameye Basya ke tîya bi giranîye, fedakarîye û mutewazîye xo ameyêne naskerdene. Rixmo ke wina ciwane bî gama ke karê ci ameyêne vînayene merdim/e şarmîyayêne. Warê Girê Sorî dişmenî rê nêzdî bi. Coka waştêne uca tecrube bîgêro. Rêxistine de lez pêşaye. Na serra xo de bi ruhê Apoyîye şer kerd û bi hewayêkê qehremankî şehîde bîye.

Argêşî vatêne ma do destan binusê

Argêş bado ke cayanê cîya cîyayan de mend ame Avaşîn. Cinîyan rê zaf nêzdî bi, heme tengayîyanê cinîyan de kişta înan de bi. Avaşîn de yewîya xoser de wextêk cayê cinîyan de mend. Zaf qîmet dayêne cinîyan. Tim waştêne bido dişmenî ro. Reya verêne wina şertanê zehmetan de bi la lez mûsa. Zerrîya ci zaf pake bî. Vatêne ''Ez do nê qilî cameverî, ma do tîya destan binusê.''

Girê Sorî ra hîrê gerîlayî vejîyayî

Tunelanê şerî yê Girê Sorî ra hîrê kesî vejîyayî. Nê qalkerdiş hetê înan ra ame kerdene. Ma bi vateyê înan temam kenê: ''Heme dejî û rindîye pîya bi nê embazan ciwîyaye; her çî de, heme tengayîyan de ma paştî daye yewbînan. Ma zanê ke ma çend qala înan bikerê qîm nêkeno. Çîyo ke ma dejneno xora no yo.  Hinê barê ma dahîna giran o. Wezîfeyê ma yo ke ma înan bidê ciwîyayene û qala înan bikerê; berpirsîyarîya ma ya ke ma înan xo de biafernê. Seba ke ma nê têkoşîn de ca girewt û nê embazan reyde ciwîyaye ma pê sereberz ê. Waştişê embazan o tewr pîl obi ke waş têkoşînê înan û hêrişê dişmenî bêro zanayene. No wesayetê înan bi. Ma do beyraqa înan tim berz bikerê û ercê ke înan afernayî bidê ciwîyayene.  Ma do bi ruhê nê têkoşînî biciwîyê û miheqeq ser bikewê.''