Meclîsê Îdareyê Xoserî yê Şingalî (MXDŞ) derheqê hêrişanê vera Şingalî ke rojanê peyênan de zêdîyayî de eşkerayîye daye û vat PDK û dewleta tirke serê Şingalî ra asayîşê Iraqî fînenê tehluke.

Hêrişanê heweteyê peyênî de fermandarê YBŞyî Pîr Çeko û Agir Cefrî û endamê Îdareyê Asayîşê Êzidxanî Şêrzad Şemo Qasim şehîd bîyî. MXDŞyî eşkerayîya xo de verî şehîdî yad kerdî û vegn da hukmatê Iraqê Federalî, hêzanê mîyanneweteyî û şarê êzidî da.

Eşkerayîye de çîyê ke vejîyayî vernî wina yê:

''Çend rojî yo sey dewamê fermananê Şingal de vera êzidîyan hêrişî yenê kerdene. Hema ma tezîyeya fermandaranê xo Pîr Çeko û Agir Cefrîyî nêqedînaye vizêr xebera şehadetê pawitoxê  herra Êzidxanî Şêrzad Şemo Qasimî ameye. Hêrişê vera şar û herra ma ya bimbareke nomal nîyê. Nê hêrişî dewamê fermanan ê. Ma manayê nê hêrişan zanê. Wazenê ke şarê êzidî bikerê bêhêz û bêpawitiş ke wa qirkerdiş bêro temamkerdene. Roja  ke YBŞ-YJŞ û Asayîşê Êzidxanî ameyî ronayene, no sey kalbeyî ginayo zerrîya dişmenî ro. Hêrişê peyênî polîtîkayanê qirkerdişê vera êzidîyan nîşan danê. Coka ma tedbîranê xo yê ke hewce kenê, genê. Wa pêro şar û dostê bizanê ke ma ver bi rewşêka newî rî bi rî yê.

Ma hêvî kerdêne ke hukmato newe yê Iraqî do problemanê Şingalî çareser bikero la bêvengîya hukmatî û partîyanê sîyasîyan ê Iraqî herinda hêvî de persan afernena. Her çiqas nê hêrişî hetê dewleta tirke ra pê hemkarîya PDKyî bêrê kerdene zî herra Iraqî de benê û hukmat  qet yew tewir nêmojneno. Ma vînenê ke Pêkerdişê 9ê Teşrîna Verêne yeno caardene. Ma wazenê hukmatê Sudanî ra bipersê no pêkewtiş qey nêameyo betalkerdene. Heme pêkerdişê ke hukmatê Kazimî ra mendî, ameyî betalkerdene, no pêkerdiş qey hema betal nêbîyo? Hukmatê Iraqî bi bêvengîya xo beno hemkarê hêrişan.

Ma vînenê ke ê wazenê hêzanê ma yê pawitişî yê YBŞ-YJŞ û Asayîşê Êzîdxanî çîn bikerê. Ma sey îradeyê êzidîyan û heme dezgehê Şingalî heme averşîyayîşan nêzdî ra teqîp kenê. Îstîkrarê Şingal û Iraqî yewbînan a pabeste yo. Sere de dewleta tirke pêro zanê ke badê binkewtişê DAÎŞî 8 serran ra nata cayo tewr biasayîş ê Iraqî Şingal o. Estbîyayîşê hêzanê pawitişî yê Îdareyê Xoserî yê Şingalî yewîye û asayîşê Iraqî hêzdar kenê. Coka ganî hukmatê Iraqî hêrişê vera Şingalî sey hêrişê vera Bexdadî bihesibno.

Senî ke rayapêroyîye zano şarê êzidî ke kampanê Başûrê Kurdîstanî de yo, nêeşkeno agêro herra xo ya bimbareke. Newe ra înşakerdişê Şingalî rojdem de yo. Dewleta tirke û PDK  wazenê verê nê bîgêrê û Şingalî bikerê veng. Gerek hukmatê Iraqî nê polîtîkayan bivîno û verê ci bîgêro. Ma veng danê ke wa şarê ma wayîrê dezgehanê pawitişî yê Şingalî bivejîyo. Bi seyan şehîdan Şingal emanetê ma kerd, gerek ma wayîrê ci bivejîyê. Her çîyî ra ver gerek ma destûr medê ke xayînî nêzdîyê Şingalî bibê û gerek ma dişmenî ra hesab bipersê. Wa hêzê mîyanneteweyî zî vera hêrişan paştî bidê Şingalî. Bedelê ci çi beno wa bibo, ma do rêça şehîdanê xo de Şingalê azad û xoserî înşa bikerê.''