Endamê Komîteya Rayberdişî ya PKKyî Murat Karayilanî û Fermandarê Qerargehê Merkezî yê Pawitişê Şarî Murat Karayilanî cewab da persanê Yenî Ozgur Politika.

Qiseykerdişê Karayilanî ra beşo peyên bi kilmî wina yo:

''Şarê kurdî xora bi serran o yeno eciqnayene. Qey badê Mûsûl û Reqayî verê xo merkezanê dewletan nêda, da kurdan! No planêk bi.  Rolê dewleta tirke tîya eşkera yo. Belka xetaya pîle aye bî ke înan kerd. Eke înan PKKyo ke înan ra hêzdar o û xo semedê dewaya xo feda keno hole nas bikerdêne wina yew xeta nêkerdene.  Ê ameyî Kurdîstan û raştê zinarê wişkî ameyî û vînî kerd. Coka ma hema destpêkerdişê şerê Kobanê de vat no şer do bibo destpêkerdişê qedîyayîşê DAÎŞî. Bado ke Kobanê ame pakkerdene ma waşt hêzanê xo peyser binacê. Çunke zaf kadroyê ma tîya şehîd bîyî.

Xora tay fekfuzulê ke qet fedakarîye nêkerda ewro vanê 'wa hêzê Rojawanî dîyalogê xo bi PKKyî bibernê' la ê rojanê ke her kes DAÎŞî ver remayêne kamî vera ci têkoşîn kerd û o bin fîna kenê ke nê bidê vîrakerdene. No serkewtiş bi bedalanê ke Kobanê, Şingal, Mexmûr û Kerkukî dîyayî ame destfînayene. Ma têna Başûrê Kurdîstanî de têkoşînê vera DAÎŞî de nizdê 500 şehîdî dayî. Bado ke DAÎŞ bin kewt ma verî dormeyê Duhokî ra dima zî hêzê xo yê Laleşî peyser antî.  Pede pede ma Kerkuk de hêzê xo tay kerdî û Şingalî ra  hêzê xo antî. Şingal de sere de tay embazî semedê perwerdekerdişê YBŞyî mendî.

Rojawan de YPG û YPJyî  şarê xo pawit. Paştdayîşê PKKyî moral da înan û hetê şerî û rêxistinbîyayîşî ra ê hêzdar kerdî. Nê wird rêxistinî yew nê yî. YPG-YPJ ke peyra tewrê QSDyî bîyî xo bi nasnameyê xo heme dinya de da naskerdene û qebûlkerdene. Çîyo ke ma kerd hela tenge da ma paştî daye înan. Dewleta tirke seba ke nêwezana kurdî Sûrîye de biresê heqanê xo tim YPG û PYDyî sey PKKyî hesibnena. Cehd kena ke înan bifîno lîsteya terorî û têkoşînê kurdan ê ucayî tesfîye bikero.

Eke o wext DAÎŞî Kobanê bifînayêne dest hinî çew nêeşkeayênê verê ci de vindero, ey do îşxalê xo vila bikerdêne la serkewtişê Kobanê maneyê ci şikit. Naye  ra her kesî paştî girewte. Iraq û pêşmergeyan xo ard pêser û vera DAÎŞî her kesî destpê têkoşînê bitesîrî kerd. Şerê Koalîsyonê Mîyanneteweyî yê heweyî yê vera DAÎŞî muhîm o la netîceyê ci yê pratîkî estê. Reyna têkoşînê welat û hêzanê bînan ê vera DAÎŞî zî muhîm o la eke têkoşînê PKKyî yê Şingalî adirê xoverdayîşî tanêfînayêne û serkewtişo pîl dest nêfînayêne vera DAÎŞî têkoşîno winayên nêameyêne dayene. Mesela hêzanê koalîsyonî  têna hewayî ra dayêne çeteyan ro. Erdî de hêzê înan bibî la ê zî hetê hêzanê herêmîyan ra ameyêne pawitene. YPGyijan dormeyê yewîyanê Amerîka pawitêne. Têna pê şerê hewayî nêbeno. Bi qala kilme ma bi keda pîle û rişnayîşê gonî her kesî ra verî têkoşînê vera DAÎŞî girewt xo ser.

No serkewtiş pê perspektîvanê Rayber Apoyî ame destfînayene. Hema ke tecrîd zaf giran nêbi, heyetê şinî ameyêne Rayberîye perspektîfê semedê Şingal, Kerkuk û Başûrî daybî û semedê Kobanê seferberîye îlan kerd.  Rayîr mojna şarê ma û verê şerkerdişê hêzanê ma akerd. Nê Rayber Apoyî afernayî. No semedê merdimîye xizmeto pîl o. Cehdkerdişanê Rayber Apoyî peynîya DAÎŞî ard. Perspektîfê Netewa Demokratîke yê Rayber Apoyî Rojawan de şarî ardî têhet û rayîrê xopawitiş û têkoşînî mojna înan. Şehîdanê ma yê qehremananê ke Rayber Apo raşt fam kerd û vatişê ci ardî ca serkewtiş fîna dest. Ma reyna şehîdanê xo yad kenê ke xeyrê înan verê DAÎŞî ame girwtene. Ma sey PKKyî yo ke xo sey partîya merdimîye pênas keno, pê sereberz ê ke ma têkoşînêko winayên kerd. Eke ewro çîyo winayên bibo ma do reyna têkoşîn bikero. Xora ma vera têrorê AKP-MHPyî yo ke zîhnîyeto nimetê yê DAÎŞî yo têkoşîn kenê.

Hêrişê vera zîndanê Hesekê eşkera yo ke hemleya newe ra ganîbîyayîşê DAÎŞî ya. Hêrişo wina hîra zaf zehmeto ke bê xebara dewletanê hegemonan ê herême bêro kerdene. Çunke no hêriş qerargahê Serêkanîyê de ameyo organîzkerdene. Amerîka destûr da Tirkîya ke Girê Sipî û Serêkanîyê îşxal bikero. DAÎŞ zî tîya qerargehê xo na ro. Xora ê ke Serêkanîyê de yê ferqê înan û DAÎŞî çîn o. Bêşik seba ke dewleta tirke Serêkanîyê îşxal kerd DAÎŞ ewro Hesekê de no hêriş kerd. Rûsya û Amerîka dirîyîye kenê û gorayê destkewteyanê xo têgêrenê. Ê vînenê ke Tirkîya pîya bi DAÎŞî Îdlîb, Serêkanîyê û Girê Sipî de se  kena la vengê xo nêvejenê. Heta ke dewleta tirke paşt bido DAÎŞî o do nêro qedînayene. Nika DAÎŞ cayanê ke dewleta tirke îşxal kerdî de xo rêxistine keno. Semedê tesfîyekerdişê DAÎŞî ganî Tirkîya xo Sûrîye ra peyser bianco û Tirkîya û Katar paştî medê ci. Heta ke ê paştî bidê do grûbê terorîstê ke xo bi nameyê îslamî pênas kenê tim bibê. DAÎŞ sey rêxistinêke werta bêro wedaritene zî zîhnîyetê ci do tim bibo.''