Artêşa tirke ya îşxalkere 14ê nîsane ra nata hêrişê Zap, Metîna û Avaşînî kena û heta nika nê hêrişan de bombayanê nukleran ê taktîkî ra heta gazanê kîmyewîyan her tewirê çeka kîmyewîye şuxilna. Nê panc mengan de Merkezê Îrtîbatî û Çapemenîye yê HPGyî derheqê hêrişanê kîmyewîyan de dîmenî û agahîyî dayî û pare kerd ke artêşa îşxalkere 2004 reyî bombaya fosfore, termobarîk, nuklere û çekê bînî yê kîmyewî yê qedexekerdeyî şuxilnayê.

Rixmê peygoşîya dezgehanê mîyanneteweyîyan û rayaumûmîya dinya zî seba tesbîtê sûcanê dewleta tirke heyetêk çend rojî verî Ewropa ra şibi Başûrê Kurdîstanî. Heyeto ke tede Dr. Jan van Aken û Serekê Şubeyê Swîsre yê Doktoranê Mîyanneteweyîyan ê Vergirewtişê Şerê Nuklerî (IPNW) Josef Savarî est bîyî, raştê astengîya PDKyî ame la reyna zî cigêrayîşê xo da destpêkerdene la OPCW hema zî verê sûcanê dewleta tirke de bêveng o.

Hezîrane ra heta êlule mîyanê çar menganê vîyarteyan de dîmenê rojnameger û xeberan weşanîyayî. ANFyî nê xeberî bi emailî ofîsê çapemenîye yê OPCWyî rê şawitî û persê 'Şima do nê dîmenan ser o cigêrayîşêkî bidê destpêkerdene yan nê?' pers kerd la cewab nêdîya.

Ha 9 dîmen û agahîyê serê hêrişanê artêşa tirke yê vera Zap, Metîna û Avaşînî:

 

Çeperê Şehîd Berxwedanî yê Girê Şehîd Şahînî de îsbat bi ke artêşa îşxalkere çekê kîmyewîyî şuxilîyayê. Dîmenê ke 25ê hezîrana 2022yî de ANF de weşanîyayî tede gerîlayêko maskekerde vano ke ''Çeka kîmyewîye şuxilnenê, boya ci giran a.'' Gerîla vano ke gaz xo verdeno qirikê merdiman, merdiman nênefes verdeno. Gerîla vano ke tesîrê gazê kîmyewî mîyanê tunelan de dewam keno û maske ra ê eşkenê bikewê tunelan. 

Tunelanê şerî yê Werxelê de zî dîmenê ke 16ê temmuza 2022yî de ANF de weşanîyayê de eşkera bi ke komêka leşkeranê tirkan vejîyena cayêkê nêzdîyê tunelanê xoverdayîşî yê gerîlayan, xortumêk şawenê war û bi xortumî gazanê kîmyewîyan verdenê mîyanê tunelî.

Warê Xoverdayîşî yê Girê Amedîyê de gerîlayêkî dîmenê kapsulêkê kîmyewî çeperanê Girê Şehîd Pîrdoxanî de belge kerd û vat: ''Ewro 11ê temmuza 2022yî yo.'' Dîmenî 17ê temmuze de ANF de weşanîyayî. Heman gerîla dîmenan de vano: ''10ê temmuze de dişmenî waşt ke çeperan de teqayîşêk bikero û wexto ke çekê kîmyewî şuxilnayî no kapsul kewt zere. Ser de nuşteyêk çin o, tira toz vejîya.''

Warê Xoverdayîşî yê Girê Hekarî de dîmenê ke 20ê tebaxa 2022yî de ANFyî de weşanîyayî tede asenê ke vera tunelanê şerî yê Şehîd Hêjarî amadekarîya herişê bi bombaya nuklere û çekanê kîmyewîyan yena kerdene. Dîmenan de aseno ke panc leşkerî bombaya nuklere ya taktîkî bi qebloyan girê danê û şawenê narê tunelan.

Warê Xoverdayîşî yê Girê Hekarî de dîmenê ke 24ê tebaxa 2022yî de ANF de weşanîyayê tede aseno ke çeperanê Girê Şehîd Zemanî de bombaya nuklere yena teqnayene. Dîmenan de aseno ke teqayîşî ra verî artêşa îşxalkere herême ra vejîyena û teqayîş tesîrê panc km dûrî zî keno. Bi tesîrê teqayîşî kamera zî lerzena.

Warê Xoverdayîşî yê Karkerî de dîmenê ke 26ê tebaxa 2022yî de weşanîyayî tede asenê ke vera çeperanê şerî yê Girê Ortê bombaya nuklere ya taktîkî şuxilîyena. Dîmenan de aseno ke bombayê nuklerî bi hemwextî yenê teqnayene û adir keweno tunelan.

Dîmenê ke 19ê êlula 2022yî de weşanîyayî tede aseno ke Warê Xoverdayîşî yê Girê Amedîyê de vera tunelanê Girê Şehîd Pîrdoxanî artêşa îşxalkere bombaya nuklere teqnena. Vengê teqayîşî dûrî ra zî yena. Leşkerê îşxalkerî verî fekê tunelî kontrol kenê dima zî çeka kîmyewîye verê tunelî de ca kenê. Dima zî leşkerê tirke herême ra şinê û çeke teqnenê, dima herême de gazê jehrînî yê reş, zerd û sûrî vejîyenê berzî.

 

Dîmenê ke 27ê êlula 2022yî de weşanîyayî tede aseno ke Girê Şehîd Pîrdoxanî yê Warê Xoverdayîşî yê Girê Amedîyê de artêşa tirke vera gerîlayan bombaya qedexekerde û çekanê kîmyewîyan şuxilnena. Dîmenan de aseno ke artêşa îşxalkere bombayanê kîmyewîyan bi bîdonan bena verdena tunel û çeperanê şerî. Artêşa îşxalkere bi teqnayîşê nê bombayanê qedexekerdeyan û gazanê kîmyewîyan xîret kena ke gerîlayan qetil bikera.